बिरगंज। भारतीय क्लब वोन्डर्स नोयडाले प्रो क्लब टि-२० च्याम्पियनसिपमा शसस्त्र प्रहरीको एपीएफ क्लबमाथि ८ विकेटको जित हात पारेको छ ।
एपीएफले दिएको १ सय ४५ रनको लक्ष्य नोयडाले १६.२ ओभरमा मात्र २ विकेट गुमाउँदै पूरा गर्यो । नोयडाको जितमा ऋतिक भत्सले २१ बलमा ६ चौका र ३ छक्कासहित ४६ रनको योगदान दिए भने हर्षित सेठी ३५ बलको सामनामा ३ चौका र ३ छक्काको सहायतामा ४५ रनमा अविजित रहे ।
त्यस्तै सिद्धार्थ गोस्वामी ३४ बलमा ४ चौका र २ छक्कासहित ४३ रनमा अविजित रहे । ऋतिक आरोराले १२ रन बनाए । बलिङतर्फ एपिएफका कमल खत्री र विपिन खत्रीले एक-एक विकेट लिए ।
त्यसअघि नारायणी क्रिकेट ग्राउन्ड बिरगंजमा टस हारेर पहिला ब्याटिङको निम्तो पाएको एपिएफले २० ओभरमा ५ विकेट गुमाउँदै १ सय ४४ रन बनाएको थियोे ।
एपिएफका लागि प्रदीप ऐरीले २२ बलमा १ चौका र १ छक्कासहित सर्वाधिक २४ रन बनाउँदा आसिफ शेख १९, हरिशंकर शाह २३, सन्दीप जोरा २०, लोकेश बम १९ र अमर सिंह राउटेलाले १७ रन बनाए।
बलिङतर्फ नोयडाका एलिप्त गुप्ताले २ तथा ऋतिक भत्स, सन्जीव चतुर्बेदी र हर्षित सेठीले एक-एक विकेट लिए । जितसँगै वण्डर्सले महत्वपूर्ण २ अंक जोडेको छ। यो उसको पहिलो जित हो। वण्डर्स चौथो स्थानमा छ।
