Blog

काठमाडौं।  नेपाली महिला भलिबल टोलीले ऐतिहासिक जित हात पारेको छ।नेपाली भलिबलको ईतिहासमा भारतलाई पराजित गर्दै नेपालले ईतिहास रचेको हो। यो सँगै महिला भलिबलमा भारतलाई हराउने दशकौंदेखिको चाहना शनिबार पुरा भएको छ ।

काभा वुमन्स नेसन्स लिग २०२४ अन्तर्गत नेपालले शनिबार दशरथ रंगशालामा भारतलाई ३–२ को सेटमा हराउँदै ऐतिहासिक जित हात पारेको छ । नेपालले २५–१८, १२–२५, २५–१७, १८–२५ र १५–१३ ले हराउँदै इतिहास रचेको हो । २०४३ सालदेखि सुरु भएको नेपालको महिला भलिबलमा भारतलाई पहिलो पटक हराएको हो ।

ललितपुर। एकेडेमिक एण्ड लर्निङ्ग अचिभमेण्ट थ्रो रियल मेनेजमेण्ट (अलार्म) नेपालको मूल आयोजनामा एक दिने विद्यालय स्तरिय र्‍यापिड बुद्धिचाल प्रतियोगिता ललितपुरको एकान्त कुनामा सम्पन्न भएको छ।

प्रतियोगितामा ललितपुरको साईनिङ्ग स्टार सेकेण्डरी बोर्डिङ स्कूलले खुल्ला र महिला दुवै विधामा २२ अंक जोड्दै पहिलो स्थान हासिल गर्न सफल भएका छन्। किडल्याण्ड बोर्डिङ स्कूलले १६.५ अंक बनाएर दोश्रो स्थान हात पारेका छन् । त्यस्तै नाजारथ बोर्डिङ स्कूलले १५.५ अंक बनाएर तेश्रो बन्न सफल भए।
प्रतिस्पर्धामा खुल्ला तर्फ साईनिङ्ग स्कूलका यमन खड्काले सात चरणको खेलमा अपराजित रहँदै आफूलाई अब्बल साबित गरेका छन्। यमनले ७ अंक जोडेर सतप्रतिशत नतिजा आत्मसाथ गर्दै प्रथम स्थान हासिल गरेका छन्। मेघा बोर्डिङ स्कूलका एञ्जल अधिकारीले ६ अंक बनाएर दोश्रो स्थान प्राप्त गरेका छन् भने किडल्याण्ड बोर्डिङ स्कूलका सिमोन पौडेलले ५.५ अंकमम रहि तेश्रो स्थान ओगट्न सफल बने।

साईनिङ्ग स्टार्स स्कूलकै प्रबज्योति कोर अरोराले प्रतिस्पर्धामा प्रतिस्पर्धात्मक ५.५ अंक जोडेर महिला तर्फ च्याम्पियन बनेकी छन्। अरोरासंग झिनो अन्तरले पछि परेकी नाजारथ बोर्डिङ स्कूलकी अनुष्का श्रेष्ठ ५.५ अंक नै जोडेर पनि दोश्रो स्थानमा रहनु परेको थियो। यस्तै किडल्याण्डकी शलिना राई ५ अंक बनाएर तेश्रो स्थानमा उभिएकी छिन्।
यसैगरी खुल्ला तर्फ अमरकमन्ति स्कूलका जेबिल डंगोल चौथो, मेघा स्कूलका गौरव हुमागाई पाँचौ, यशस्वी गुरुकुलका डेभिड कुशु कटुवाल छैटौं, साईनिङ्गका रियाज तण्डुकार सातौं, पिस गार्डेनका बिएस माझी आठौं, न्यू लाइफ स्कूलका ईश्वर श्रेष्ठ नवौं र नाजारथ स्कूलका आर्य खड्कि दशौं स्थानमा रहेर प्रतियोगिता अन्त्य गरेका छन्।
महिला तर्फको प्रतिस्पर्धामा प्याराडाइज स्कूलका सोफिया खत्री चौथो, पिस गार्डेनका श्रीजला महर्जन पाँचौ, साईनिङ्गका युनिका श्रेष्ठ छैटौं, नव पर्वत सेकेण्डरी स्कूलका सुजाता थापा मगर सातौं, अमर कान्ति स्कूलका अंकिता तामाङ्ग आठौं, एकता एकेडेमीका सुविज्ञा श्रेष्ठ नवौं र माउण्ट हार्मोनका युनिका श्रेष्ठ दशौं भएकी छिन्।
प्रतियोगिताको समापन समारोहमा पाब्सन नेपालका केन्द्रीय सचिव रविनसन शर्माले बिजेता विद्यालयलाई आकर्षक ट्रफि वितरण गरेका थिए। शर्माले नेपाल बुद्धिचाल महासंघ संग बुद्धिचाल खेलको बृहत्तर बिकासका लागि सम्झौता गर्ने प्रतिबद्धता जाहेर गरेका छन्। ललितपुर जिल्ला पाब्शनका उपाध्यक्ष तारा खनालले बौद्धिक खेल बुद्धिचाल प्रतियोगिता मार्फत विद्यार्थीहरुमा सकारात्मक सोचको अभिबृद्धि हुने भएकोले शिक्षा जगत आकर्षित भइरहेको धारणा राखेका थिए । बुद्धिचाल महासंघका केन्द्रीय सदस्य राजु ताम्राकारले बुद्धिचाल खेलको औचित्य बारे मन्तब्यमा प्रकाश पारेका थिए ।

बुद्धिचाल प्रतियोगिता प्रमुख निर्णायक सिनियर आर्विटर सोराज ताम्राकारको रेखदेखमा सम्पन्न भएको थियो भने कूल २० विद्यालयका ५८ छनौट विद्यार्थीहरुको सहभागीता रहेको थियो। प्रतियोगिताका संयोजक कन्हैया कुँवरको सभापतित्वमा सम्पन्न समापन समारोहमा तीन पालिकाका पाब्शन प्रमुख, विद्यालयका प्रधानअध्यापक, खेल कर्मी र पत्रकार बन्धुहरुको उपस्थिति रहेको थियो।

प्याब्सन अन्तर्गत ललितपुरका २५ वटा निजि विद्यालय मिलेर रचनात्मक अभियान सञ्चालन गरिरहेको अलार्म नेपालले पहिलोपटक बुद्धिचाल प्रतियोगिता सञ्चालन गरेको हो।

काठमाडौं। काठमाडौंमा एक दिने राष्ट्रिय र्‍यापिड रेटिङ्ग चेस हुने भएको छ। प्रतियोगिता खुल्ला र रेटिङ्ग १७ सय मुनिको हुनेछ । नेपालका शीर्ष १५० जना राष्ट्रिय खेलाडीहरुको सहभागीता रहने प्रतियोगिता आगामी श्रावण १९ गतेका दिन मित्रनगरस्थित पुष्पकुञ्ज उच्च माध्यमिक विद्यालयमा सम्पन्न हुनेछ।

संयोजक सुवास कुमार गुरुङका अनुसार  प्रतियोगिता स्विस लिगका आधारमा जम्मा ७ चरणको खेल खेलाइनेछ । यस प्रतियोगितामा अन्तराष्ट्रिय नियम अनुरुप प्रतिस्पर्धाका लागि सिनियर खेलाडीहरुले  १० मिनेट + १० सेकेण्ड इन्क्रिजमेण्ट समय नियन्त्रणमा खेल्नेछन्। गुरुङका अनुसार प्रतियोगिताका बिजेताहरुले कूल नगद पुरस्कार राशी  ९१,५०० हात पार्ने छन्।नेपालका युवा खेलाडीहरुलाई लक्षित गरि आयोजना गरिरहेको राष्ट्रिय प्रतियोगिताका प्रमुख निर्णायक अन्तर्राष्ट्रिय आर्विटर महेश्वरलाल डंगोलका अनुसार खुल्ला तर्फ प्रथम हुनेले आकर्षक ट्रफि, गोल्डमेडल, प्रमाणपत्र र नगद पुरस्कार १५ हजार, दोस्रो हुनेले शिल्भर मेडल, प्रमाणपत्र, नगद पुरस्कार १० हजार , तेस्रो हुनेले ब्रञ्ज मेडल, प्रमाणपत्र, नगद पुरस्कार रु. ६ हजार, चौथोले नगद पुरस्कार रु. ४ हजार, पाँचौं देखि दशौं स्थानमा रहने खेलाडीलाई नगद ९ हजार ५ सय प्रदान गरिने बताएका छन्।

यस्तै अर्को विधा अन्तर्गत अन्तर्राष्ट्रिय रेटिङ्ग १७०० सय मुनिको श्रेणीमा प्रथम पुरस्कार १० हजार रुपैयाँ, दोस्रो पुरस्कार ६ हजार रुपैयाँ, तेस्रो पुरस्कार ४ हजार तथा चौथो देखि दशौं स्थान सम्मका खेलाडीले नगद १ हजार हात पार्ने छन्।

यसैगरी प्रतियोगितामा विशेष पुरस्कार प्राप्त गर्नेमा उत्कृष्ट महिला खेलाडीलाई २ हजार, दोस्रो स्थानको महिला खेलाडीलाई एक हजार ५ सय, उत्कृष्ट अण्डर १६ खेलाडीलाई एक हजार, उत्कृष्ट अण्डर १४ खेलाडीलाई एक हजार, उत्कृष्ट अण्डर १२ खेलाडीलाई एक हजार रुपैयाँ उत्कृष्ट अण्डर १० खेलाडीलाई एक हजार रुपैयाँ र ५५ वर्षमाथिका खेलाडीलाई २ हजार रुपैयाँ प्रदान गरिनेछ।

एजेन्सी। सन फ्रान्सिस्को युनिकर्नलाई पराजित गर्दै वासिङ्टन फ्रिडमले दोस्रो संस्करणको मेजर लिग क्रिकेट (एमसिएल) जितेको छ । अमेरिकाको डालसमा सोमबार बिहान भएको फाइनलमा वासिङ्टनले ९६ रनको फराकिलो जित हात पार्दै उपाधि जितेको हो ।

वासिङ्टनले दिएको २ सय ८ रनको लक्ष्य पछ्याएको सन फ्रान्सिस्कोले १६ ओभरमा अल आउट हुदै १ सय ११ रन मात्र बनायो ।

सन फ्रान्सिस्कोका लागि कर्माल रुक्सले १९ बलमा सर्वाधिक २० रन बनाए । जोस इंग्ल्सिले १८, फिना एलेन, सन्जय कृष्णमुर्ती र प्याट कमिसले समान १३ रन जोडे । वासिङ्टनका लागि मार्को यानसन र रचिन रविन्द्रले समान ३, एन्ड्रु टायले २ तथा सौरभ नेत्राभाल्कर र ग्लेन म्याक्वेलले समान १ विकेट लिए ।

त्यसअघि टस हारेर पहिले ब्याटिङ गरेको वासिङ्टन फ्रिडमले निर्धारित २० ओभरमा ५ विकेट गुमाएर २ सय ७ रन बनाएको थियो ।

वासिङ्टनका लागि कप्तान स्टिभ स्मिथले ५२ बलमा ७ चौका र ६ छक्काको सहयोगमा सर्वाधिक ८८ रन बनाए ।ग्लेन म्याक्सवेलले २२ बलमा ४० रन बनाउँदा आन्र्देश गौसले १४ बलमा २१ रन थपे । मुख्तार अहमदले अविजित १९, ओबस पिनारले १३ र ट्राभिस हेडले ९ रन बनाए ।

सन फ्रान्सिस्कोका लागि प्याट कमिन्सले २, हसन खान, हरिस रउफ समान १ विकेट लिएका थिए ।

वासिङ्टनले पहिलो पटक लिग जितेको हो । पहिलो संस्करणमा एमआई न्युयोर्क च्याम्पियन भएको थियो ।

ललितपुर। विश्व बुद्धिचाल महासंघको स्थापनाको अवसर पारेर विश्वभर एकसाथ चेस प्रतियोगिता सम्पन्न भएको छ। सन् १९२४ जुलाई २० का दिन स्विजरल्याण्डको जुरिचमा भएको थियो। यसै दिनको अवसर पारेर विश्व बुद्धिचाल महासंघले फिडे १०० वर्षको उपलक्ष्यमा विश्वभर रहेका आफ्ना २०५ राष्ट्र मार्फत एकै दिन विश्व खेल इतिहासमा सबै भन्दा बढी खेलाडीहरुलाई सहभागी गराउँदै विश्व किर्तिमान कायम गराएको छ।
विश्व भरका हरेक कुनामा बुद्धिचाल खेल सम्पन्न भइरहँदा नेपाल बुद्धिचाल महासंघको तत्वावधानमा पनि आजै देशभरका दश फरक स्थानमा खेल सञ्चालन भएका छन्। नेपालको काठमाडौं, ललितपुर, भक्तपुर, पोखरा, झापा, सुदुरपश्चिम, कञ्चनपुर र धरान शहरका १० स्थानमा एकै दिन बुद्धिचाल खेल खेलाइएको हो।
काठमाडौंको वसुन्धारामा भएको प्रथम जिएसि अन्तर्राष्ट्रिय चेस प्रतियोगितामा रामभक्त श्रेष्ठ प्रथम, सुजन काफ्ले द्वितीय र सुरेन्द्र लामा तृतीय भएका छन्। कञ्चनपुरमा भएको नेपाल प्रथम सार्क खुल्ला चेसमा धनबहादुर बोगटी प्रथम, दीर्घराज जोशी र वसन्त रावल तृतीय भएका छन्।
भक्तपुर जिल्ला खुल्ला फिडे १०० ब्लिज खेलमा क्षितिज भण्डारी प्रथम, पुरुषोत्तम सिलवाल र बद्रीलाल नेपाली तृतीय स्थानमा रहन सफल भएका छन। ललितपुरको महालक्ष्मी नगरपालिकामा भएको जेजेज्ज क्याफे फ्रेण्डलि रेटिङ्ग चेसमा आशिष् फूँयाल, गोविन्दप्रसाद पौडेल र हर्कबहादुर चोङ्वाङ्ग तृतीय हुन सफल भएका छन्।
पोखरामा सम्पन्न सुजेन्द्रप्रसाद श्रेष्ठ स्मृति भेट्रान चेस प्रतियोगितामा रामबहादुर क्षेत्री, बुद्धिराज शर्मा र बिनोद नाल्मि तृतीय भएका छन्। काठमाडौंको बिजुलि बजार स्थित किङ्स कलेजमा सम्पन्न चेस खेलमा नेपाल बुद्धिचाल महासंघका केन्द्रीय सदस्य राजु ताम्राकारका अनुसार नेपालका विभिन्न जिल्लामा सम्पन्न भएका खेलहरुमा ५०० भन्दा बढी नेपाली खेलाडीहरुले गिनिस बुक वर्ड रेकर्ड अन्तर्गत नाम राख्न सफल भएका छन्। ताम्राकारका अनुसार नेपाली विजेता खेलाडीहरुलाई स्थानीय पालिकाका जनप्रतिनिधिहरुले पुरस्कार वितरण गरेका छन्।
जस अन्तर्गत ललितपुर महालक्ष्मी नगरपालिकाका मेयर हरि गोविन्द श्रेष्ठ र उपमेयर लक्ष्मी महर्जनले बुद्धिचाल खेलका विजेताहरुलाई पुरस्कार वितरण गर्दै नगरपालिकाले बुद्धिचाल खेललाई आर्थिक वर्षमा यथेष्ट बजेट विनियोजन गरेको कुरा बताएका छन्। यस्तै भक्तपुर नगरपालिकाका मेयर सुनिल प्रजापतिले राष्ट्रिय प्रतियोगिताको आयोजना विगतमा झैं आगामी वर्षहरुमा पनि गर्ने प्रतिबद्धता जाहेर गरेका छन्।

काठमाडौं। विश्व बुद्धिचाल महासंघ सन् १९२४ मा स्थापना भएको अवसर पारेर इन्टरनेशल चेस दिवसको उपलक्ष्यमा त्रियोग हाई स्कुल, धापासीले चौथो त्रियोग अन्तर विद्यालय बुद्धिचाल प्रतियोगिता आयोजना गरेको छ ।

श्रावण ३ र ४ गते गरी दुई दिन सञ्चालन हुने प्रतियोगितामा स्वीस नियम अनुसार ७/७ चरणको खेल खेलाइनेछ।

प्रतियोगिताको उद्घाटन विद्यालयको प्राङ्गणमा कार्यकारी निर्देशक अजित लामा, प्रधानअध्यापिका सविता कपरुवान, नेपाल बुद्धिचाल संघका महासचिव धरम लामा र कोषाध्यक्ष तारा बहादुर रानाभाटले गरेका थिए । काठमाडौं जिल्ला बुद्धिचाल संघका अध्यक्ष केशब श्रेष्ठको प्रयासमा ग्रासरुटवाट प्रतिभावान खेलाडी उत्पादन गर्ने हेतुले काठमाडौँ उपत्यकाका ४० भन्दा बढि विद्यालयका ३४० भन्दा बढि खेलाडीलाई सहभागिता गराइएको थियो ।

त्रियोग स्कुलको व्यवस्थापनमा आज तीन चरणको खेल सम्पन्न भएका छन्। तेस्रो चरण सम्मको खेल पश्चात् कक्षा ६–७ को छात्रा समूहमा त्रियोगकी नोयल थापा र नितेन मेमोरियलकी ज्ञानी श्रेष्ठ ३/३ अंक सहित शीर्ष स्थानमा रहन सफल भएका छन्। सोही समूहको छात्र तर्फ त्रियोग स्कूलका आभास रिमाल र सम्पन्न बज्रचार्य, सुर्योदयका अग्रीम सैजु र नितेन मेमारियलका सञ्जीव तामाङ ३/३ अंक सहित शीर्ष स्थानमा छन् ।

त्यसैगरि सिनियर कक्षा ८–१० को छात्रा समूहमा त्रियोगकी रिया श्रेष्ठ, कृपा बेलबासे, सेन्ट मेरीजकी एलिना तिमल्सिना र दिव्या सिग्देल ३/३ अंक सहित शीर्ष स्थानमा उभिन सफल रहे।यस्तै छात्र तर्फ त्रियोगका रियान श्रेष्ठ, पुष्पसदनका सुप्रभ सागर श्रेष्ठ, के.एम.सीका विधान सापकोटा र नितेन मेमोरियलका दिपक गोले ३/३ अंक सहित शीष स्थानमा छन् ।

विद्यार्थीहरुको भविष्य बुद्धिचाल खेल मार्फत उज्वल बनाउन चेस खेल सबैभन्दा उचित माध्ययम हो। सहि विचार र सहि योजनाले मात्र जीवनपथ फलदायी हुनेछ। प्रतियोगिताका संयोजक केशब श्रेष्ठले हामी यसैका लागि लागिपरेको बताए। उनका अनुसार भोली शुक्रबार बिहान ९ बजेबाट सुरु हुनेछ र समापन समारोह तथा पुरस्कार वितरण सोही दिन दिउँसो २ बजे हुनेछ ।

बिराटनगर। पाँचौ तथा निर्णायक सेटमा ७ अंकले पछि परेको स्थिति उल्ट्याउँदै कोशी प्रदेश मुख्यमन्त्री कप राष्ट्रिय महिला भलिबल प्रतियोगितामा च्याम्पियन भएको छ। मोरङको बिराटनगरमा बिहीबार सम्पन्न खेलमा सुदूरपश्चिम प्रदेशलाई पाखा लगाउँदै कोशी च्याम्पियन भएको हो। पुरानो गुद्री बजारको भलिबल कोर्टमा सम्पन्न दोश्रो मुख्यमन्त्री कप राष्ट्रिय महिला भलिबल प्रतियोगिताको फाइनलमा सुदूरपश्चिम प्रदेशमाथि कोशीले उत्कृष्ट शुरुवात गर्दै पहिलो र दोश्रो सेटमा सहज जित निकालेको थियोे । तर तेश्रो सेटमा पाँच अंकले पछि परेको सुदूरपश्चिमले उत्कृष्ट पुनरागमन जनाउँदै कोशीलाई २६-२४ ले निराश बनाएको थियोे । पहिलो सेटमा २५-२३ को जित निकालेको कोशीले दोश्रो सेटमा शानदार प्रदर्शन गर्दै २५-१८ को जित हात पारेको थियो । तर तेश्रो सेटमा उत्कृष्ट पुनरागमन जनाउँदै खेल आफ्नो पक्षमा पारेको सुपले चौथो सेटमा पनि समान २६-२४ को जित निकाल्दै कोशीलाई दबाबमा राखेको थियो ।

पछिल्ला दुई सेटमा कठिन जित निकाल्दै खेलमा फर्किएको सुपले पाँचौ तथा निर्णायक सेटमा अप्रत्याशित अंक जोडेर कोशीलाई पराजि गर्दै उपाधि जित्ने संकेत देखाएको थियोे । उसले पाँचौ सेटमा लगातार ७ अंक हात पार्दै खेल ७-० को स्थितिमा पुर्याउँदा कोशीका खेलाडी मात्रै नभई शमर्थक पनि निराश थिए । कतिपय समर्थक त घर फर्किन थालेका थिए। कोर्ट चेन्ज हुँदा कोशी ८-१ को दयनीय अबस्थामा पुगेको थियोे । तर त्यसपछि कोशीले नाटकीय रुपमा खेल आफ्नो पक्षमा पार्यो ।

उसले लगातार अंक हात पार्दै उपाधि आशा जिवित राख्दै खेल १३-१३ को अबस्थामा पुर्याउँदै सुपलाई दबाबमा राख्न पुग्यो । त्यसपछि कोशी झनै आक्रामक भयो र खेल १५-१३ ले आफ्नो पक्षमा पार्दै च्याम्पियन भयो। यो जितसँगै राष्ट्रिय महिलाा भलिबलमा कोशीले ईतिहास पनि रच्यो। जितसँगै कोशीले नगद ३ लाख हात पारेको छ। त्यस्तै उपविजेता सुदूरपश्चिमले एक लाख ५० हजार रुपैयाँ हात पार्यो। प्रतियोगिताको उत्कृष्ट सेटर सुपकी रेखा ठगुन्नाले हात पार्दा उत्कृष्ट ब्लकर कोशीकी सुनिता राई, उत्कृष्ट सर्भर सुपकी नितिसा कडायत र उत्कृष्ट लिबेरो कोशीकी मनिका श्रेष्ठ घोषित भए । उत्कृष्ट प्रशिक्षक कोशीका प्रशिक्षक शैलेन्द्र श्रेष्ठ भए। उनी पूर्व अन्तर्राष्ट्रिय भलिबल खेलाडी हुन्।

त्यस्तै प्रतियोगिताको सर्वोत्कृष्ट खेलाडीको उपाधि कोशीकी कप्तान सुनिता खड्काले हात पारिन । उनले नगद २० हजार रुपैयाँ समेत प्राप्त गरिन।

प्रतियोगिताका विजेता तथा उपविजेतालाई प्रमुख अतिथि, विशिष्ट अतिथि, अतिथहरु र खेल संयोजक थलु राजभण्डारी लगायतले पुरस्कार प्रदान गर्नुभएको थियोे । २२ गतेदेखि २७ गतेसम्म चलेको प्रतियोगिताको आयोजना कोशी प्रदेश खेलकुद विकास बोर्डले गरेको हो ।

बिराटनगर। मोरङको बिराटनगरमा जारी दोश्रो मुख्यमन्त्री कप राष्ट्रिय महिला भलिबल प्रतियोगितामा मधेस प्रदेश तेश्रो भएको छ। बुधबार सम्पन्न खेलमा बागमती प्रदेशलाई तीन एकको सेटमा पराजित गरेसँगै मधेस प्रदेश तेश्रो भएको हो। लिग चरणमा कमजोर प्रदर्शन गरेको मधेसले तेश्रो स्थानका लागि भएको खेलमा बागमतीमाथि २५-२१,२५-१२,१९-२५ र २५-२० को जित निकालेको थियोे । जितसँगै मधेसले नगद पचहत्तर हजार हात पारेको छ।

सोही प्रतियोगिताको उपाधिका लागि बिहीबार कोशी प्रदेश र सुदूरपश्चिम प्रदेश आमने-सामने हुनेछन् । खेल विहान ८ बजेदेखि शुरु हुनेछ । सो खेलको विजेताले नगद तीन लाखसँगै ट्रफी हात पार्नेछ । प्रतियोगिताको आयोजना प्रदेश खेलकुद विकास बोर्डले गरेको हो।

जर्सी। डिफेन्डिङ च्याम्पियन अर्जेन्टिना कोपा अमेरिका कपको फाइनलमा प्रवेश गरेको छ । अमेरिकाको न्यु जर्सीमा बुधबार बिहान भएको पहिलो सेमिफाइनलमा क्यानडा माथि २-० को सहज जित निकाल्दै अर्जेन्टिनाले अन्तिम दुईमा आफ्नो स्थान पक्का गरेको हो ।

अर्जेन्टिनाका लागि जुलियन अल्भारेज र लियोनेल मेस्सीले गोल गरे । अल्भारेजले २३ औं मिनेटमा गोल गर्दै अर्जेन्टिनालाई अग्रता दिलाएका थिए । पहिलो हाफमा एक शुन्यको अग्रता लिएको उसले दोश्रो हाफको ५१औं मिनेटमा दोश्रो गोल गरेको थियो। उसका लागि दोश्रो गोल कप्तान लियोनल मेसीले गोल गरेका थिए।

अब अर्जेन्टिनाले उपाधिका लागि कोलम्बिया र उरुग्वे बीचको विजेतासँग प्रतिश्पर्धा गर्नेछ । दोस्रो सेमिफाइनल खेल भोलि हुनेछ ।