राजु ताम्राकार गोवा। विश्व बुद्धिचाल महासंघको आधिकारिक वर्ल्ड आइपिसिए चेस च्याम्पियनसिपमा नेपालका विश्व विजय घिमिरेले पहिलो चरणको खेलमा सफलता हासिल गरेका छन्।
उनले भारतका दिनेश कुमार विरुद्ध प्रतिस्पर्धात्मक खेलमा जित निकालेका छन्।
भारत स्थित गोवाको इन्टरनेशनल सेन्टरमा आरम्भ पहिलो चरणको खेलमा विश्वले कालो गोटी लिएर सिसिलियन प्रणालीमा प्रतिउत्तर खेल शुरु गरेका थिए।
स्पर्धाको २१ औं चालसम्म बराबरी अवस्थामा रहेको खेलमा २२ औं चाल पुग्दा घिमिरेले आक्रमण सुरु गरेका थिए।
फल स्वरुप खेलको २७ औं चालमा पोण्ड एउटा फाइदा लिए । नेपाली घिमिरेको लगातार आक्रमणबाट रक्षात्मक अवस्थामा पुगेका भारतका दिनेेेशले ३२ औं चालमा अर्को ठूलो गल्ती गर्न पुगे। जसको फाइदा उठाउदै घिमिरेले दिनेशलाई ३८ औं चालमा खेल त्याग गर्न बाध्य बनाए।
स्वीस लिग प्रणाली अनुसार नवौं चरणसम्म संचालन हुने खेलमा विश्व विजय घिमिरे सहित प्रतियोगिताका शिर्षस्थ खेलाडीहरु पोल्याण्डका आइएम मर्सिन मोलेण्डा, इजरायलका आईएम आन्द्रेस गोर्वानोभ, आर्मेनियाका एफएम सर्गिस सर्गिस्यान, काजकिस्तान एफएम सेरिक सोल्तानोभ, रसियाका सेरेब्रियाकोभ सेर्गेइ, भारतका जि एजिलारासिले सफलता हात पार्दै पहिलो अंक जोडेका छन्।
शत्र राष्ट्रका ९७ जना खेलाडीहरुको सहभागी रहेको प्रतियोगितामा विजेताले १ लाख नब्बे हजार, उप-विजेताले १ लाख ३५ हजार र तेस्रो हुनेले १ लाख नगद पुरस्कार हात पार्ने छन् ।
प्रतिस्पर्धाका विभिन्न विधामा ४६ जना खेलाडीहरूलाई नगद पुरस्कारको व्यवस्था गरिएको छ।
आईपिसिए विश्व चेस प्रतियोगितामा नेपालका तर्फबाट अन्तर्राष्ट्रिय निर्णायक आईए यज्ञप्रसाद पन्त पहिलो पटक नेपालको तर्फबाट निर्णायकको भूमिकामा रहेका छन्।