काठमाडौं। एन्फा महिला लिग फुटबलमा कोशी प्रदेशले लगातार तेस्रो जीत हात पारेको छ ।

ललितपुरको सातदोबाटो स्थित एन्फा कम्प्लेक्सको खेलमैदानमा आईतबार सम्पन्न खेलमा कोशीले कर्णाली प्रदेशमाथि ४-० को फराकिलो जित हात पार्यो। उसका लागि पूर्णिमा राईले दुई तथा समीक्षा मगर र प्रतीक्षा राईले एक/एक गोल गरे ।

यो जीतसँगै कोशी ३ खेलमा ९ अंकसहित तालिकाको शीर्ष स्थानमा यथावत छ । कर्णाली भने ३ खेलमा १ अंकसहित पुछारबाट दोश्रो स्थानमा छ ।

एन्फा महिला लिग फुटबलमा आजदेखि तेस्रो चरणका खेल शुरू भएको हो । अखिल नेपाल फुटबल संघ (एन्फा) को आयोजनामा जारी लिगमा १० टोली सहभागी छन् ।